DIÁLOGO CON MILAGROS C.

TODO comezou cunha música irritante que se prolongou durante varias horas se sumamos os dous días que teimei con que me atendesen. Supoño que estas esperas ao teléfono agocharán a pretensión de que entremos ao diálogo coas defensas afundidas. Por fin, unha voz cansa pero resabida aténdeme: "Mi nombe es Milagros C., en qué puedo ayudarle?".

Exercito o autocontrol e presento con serenidade a miña consulta: Por que non estou dado de baixa na liña telefónica dende o mes de abril tal e como solicitei, e por que me seguen pasando os recibos de maio e xuño? Despois de me pedir o nome para se dirixir a min con amabilidade, Milagros C. entra no bucle á que a obriga o seu contrato: "Permítame que le explique, don Miguel. Si no paga la deuda que tiene con nosotros no podemos darle de baja".

Intento facerlle ver que o círculo vicioso ao que me pretende someter non é de recibo: se xa estou dado de baixa non lles debo nada: por que me seguen pasando recibos se me dei de baixa en abril tal e como poden comprobar na inactividade absoluta no número ao que me refiro?

Como Milagros C. parece muller curtida, non se desanima e retruca: "Cree usted estar dado de baja, don Miguel, pero no lo está". Como que non?, pregunto subindo unha miga o ton de voz. "No, no lo está. Lo solicitó en abril, es cierto, aquí veo una nota que así lo dice, pero falta un escrito de confirmación, una fotocopia de su DNI y su firma". Envieino, córtoa. "Entonces no tiene ningún problema, don Miguel. Nos manda un fax con ese documento y ya se hace efectiva su baja". Xa o mandei. "Pues aquí no nos consta". Cantas veces necesitarán que llelo envíe? "Una, don Miguel, con una vez que lo tengamos aquí ya queda dado de baja. Yo le recomiendo que pague la deuda y será todo más rápido". Mire, Milagros, véxooa moi metida no seu papel, sei que é unha empregada e non ten culpa do sistema de abuso ao que nos somete a súa poderosa empresa, pero non me tome o pelo, por favor. "Trato de cumplir con mi trabajo, señor. Si desea alguna otra cosa en la que pueda ayudarle...". Non. Non me pode axudar en nada. "Espero haberle ayudado, don Miguel. Que tenga buen día".

E a min quedoume cara de parvo e aplaudo o tempero de Milagros C. Con empregadas así, o sistema enredador para a raspiña destas compañías aséntase en bases sólidas. Por se non fose dabondo con que a lei os favoreza de maneira vergonzosa.